Latest News

Dalaygon Nga Liga

Nakulit na sa libro sa kasaysayan ang Pilipinas Vismin Super Cup isip labing unang propesyonal nga liga sa basketbol nga nakabasi sa habagatang mga probinsiya sa nasud ubos sa regulasyon ug superbisyon sa Games and Amusements Board (GAB).

Sa pagka karon, siyam na ka teams ang kompirmadong mopakita’g aksiyon sa labing unang season sa Super Cup nga gikatakdang mosikad karong Abril 9 sud sa bubble ubos sa istriktong patakaran sa panglawas ug kaluwasan. Upat niini gikan sa Sugbo nga mao ang ARQ Builders/Lapu-Lapu City Heroes, KCS-Mandaue City Megabytes, MJAS Zenith-Talisay City Aquastarts ug Danao City.

Kining bag-ong natawo nga liga usa ka bulawanong oportunidad alang sa mga players dinhi sa Kabisay-an ug Mindanao. Tsansa kini nila aron mapasundayag ang ilang talento ug mailhan sa nasudnong bantawan kay sagad man gud sa mga dagkong liga sa nasud tua ra didto sa kaulohan.

Mao nang saludo ko sa mga tawo luyo niining Super Cup ilabi na sa COO niining si Rocky Chan, secretary-general Chelito Caro ug Dondon Hontiveros nga maoy ambassador sa liga.

Si Hontiveros, kanhi PBA star nga nagsilbe karong konsehal sa Dakbayan sa Sugbo, hugtanong mipaluyo sa Super Cup tungod kay siya mismo produkto niining klasiha sa liga nga naghatag og bili sa mga magduduwa gikan sa probinsiya.

Balik lantaw sa iyang kaagi, si Hontiveros wala pa kaayo mailihi, apan sa kalit lang mihimo og pangan ug misulbong ngadto sa tumang pagkasikat sa dihang miduwa sa Cebu Gems sa Metroplolitan Basketball Association (MBA) duha ka dekada na ang milabay. Ang MBA nahimong taytayan ni Hontiveros aron pagkab-ot sa iyang damgo nga makaduwa sa PBA diin siya misidlak isip usa ka bitoon. Mao sab kini ang gustong pagabuhaton ug sundon sa Vismin Super Cup.

Gipadayag ni Chan nga duna sila’y tulo ka mahinungdanong tumong sa pagtukod ning liga. Una mao ang pagdiskubre og potensiyal nga mga basketbolista, bairon ang ilang abilidad sa ingon maandam sila sa mas dagkong liga. Ikaduha mao ang paghatag og kapanginabuhian niadtong may kalimbigitan sa basketbol sama sa players, coaches, referees, technical officials, utility ug uban pa. Ikatulo mao ang pag-abag sa sports tourism sa nagkadaiyang mga LGUs dinhi sa rehiyon.

Nindot kaayo ang gibuhat nilang Chan ug sa iyang grupo. Taliwala sa daghang mga hagit nga gidala ning pandemiya, nangahas sila pagporma niining liga sa tinguha nga makatabang niadtong mga nanginahanglan ug ingon man makahatag og paglaum sa kadaghanan ning panahon sa kalisdanan. Dalaygon kaayo ang misyon nga buot pas-anon sa Vismin Super Cup mao nang angayan lamang nato kining suportaan ug abibahan.

Source: Banat

Leave a Reply